Dan McCallum

Cyfarwyddwr

Roedd Dan yn gyd-sylfaenydd Awel Aman Tawe (AAT) ym 1998 ac mae wedi gweithio i’r sefydliad ers hynny. Mae Dan wedi ymgymhwyso fel syrfëwr effeithlonrwydd ynni ac mae ganddo radd mewn Hanes Modern o Brifysgol Rhydychen. Mae Dan wedi gweithio gynt i Oxfam yn Irac ac yn Swdan. Mae’n siarad Cymraeg a Ffrangeg yn rhugl, a rhywfaint o Arabeg. Derbyniodd MBE am wasanaethau i ynni cymunedol yn 2019. E-bost Dan: dan@awel.coop

Felicity Crump

Dirprwy Reolwr

Mae gan Felicity brofiad helaeth yn y sector elusennol yn ne Cymru, gan gynnwys fel gweithiwr cymorth, rheolwr prosiect ac arweinydd dwy elusen fach arall – Links, elusen iechyd meddwl, a Valley Steps, elusen llesiant – gan ddatblygu eu cryfderau sefydliadol a’u cynaliadwyedd ariannol. Mae hi bellach yn mwynhau gweithio mewn maes sy’n agos i’w chalon wrth frwydro yn erbyn newid hinsawdd.

Rôl Felicity gydag AAT, ers mis Mai 2021, yw cryfhau’r seilwaith a’r weinyddiaeth ariannol yn dilyn twf cyflym Egni yn y blynyddoedd diwethaf. Mae gan Felicity ILM Lefel 5 mewn Arweinyddiaeth a Rheolaeth ac ar hyn o bryd mae’n astudio ar gyfer ILM Lefel 7 mewn Hyfforddi a Mentora Gweithredol, sy’n crynhoi’r defnydd o dechnegau rheoli arferion da ac yn darparu offer AD y gellir eu defnyddio ar bob lefel.

Mae hi hefyd wedi gwasanaethu fel Ymddiriedolwr i YMCA Caerdydd. Mae ganddi radd mewn Celfyddyd Gain (cerameg) a gradd Meistr mewn Menter Celfyddydau Gweledol.

Emily Hinshelwood

Cyfarwyddwr Creadigol

Mae Emily yn anthropolegydd cymdeithasol ac yn ymarferwr creadigol. Mae Emily yn gyd-sylfaenydd ac yn Gyfarwyddwr Creadigol Awel Aman Tawe (AAT). Mae hi wedi ysgrifennu a dylunio holl gyhoeddiadau AAT gan gynnwys y Pecyn Cymorth Ymgynghori Ffermydd Gwynt a gyhoeddwyd gan Lywodraeth y DU, ein Dogfennau Cynnig Cyfranddaliadau Awel ac Egni, papurau academaidd a’r holl ddeunydd hyrwyddo. Sefydlodd raglen gelfyddydau a newid hinsawdd AAT yn 2010 ac ar hyn o bryd mae’n rheoli prosiect Hwb y Gors – sy’n ailwampio hen ysgol gynradd Cwmgors yn ganolfan gelfyddydau, addysg a menter di-garbon. Mae Emily yn angerddol dros ennyn diddordeb pobl mewn gweithredu ar yr hinsawdd ac mae wedi cynnal llawer o brosiectau i’r perwyl hwnnw. Ymhlith y rhain, ei ffefrynnau yw: calendr Ynni Adnewyddadwy Noeth AAT 2007 (annogwyd dros 70 o bobl i dynnu eu dillad – yn enw ynni adnewyddadwy); ei Thaith Gynaliadwy i’r Lleuad yn 2019 a oedd yn cynnwys dros 700 o bobl yn adeiladu capsiwl Lunar lle bu’n byw fel artist preswyl am bythefnos ar lawr uchaf Canolfan Gelfyddydau Pontardawe; a’i thaith gerdded ar draws Cymru (2012) lle gofynnodd i bob person y cyfarfu â hi ‘3 chwestiwn am newid hinsawdd’ a chreu cerddi gair am air o’u hatebion. Mae hi wedi cyflwyno’r rhain mewn cynadleddau hinsawdd gan Lywodraeth Cymru a rhai eraill yn y DU ac Ewrop. Ac yn wir, mae hi’n wallgo’!

Carl Richards

Swyddog Cyllid

Mae Carl wedi gweithio i Awel Aman Tawe ers 2000 fel Swyddog Cyllid. Mae ei gymwysterau perthnasol yn cynnwys Diploma Lefel III gan Sefydliad y Ceidwaid Llyfrau Ardystiedig, Cyfrifon SAGE Pitman, Tystysgrif Uwch y Sefydliad Allforio mewn Masnach Dramor, ac ar hyn o bryd mae’n astudio ar gyfer Tystysgrif ICAEW mewn Cyfrifeg Cyllid a Busnes. Mae’n Gymro Cymraeg.

Lisa Jones

Swyddog Cyllid

Ymunodd Lisa ag Awel Aman Tawe yn 2022 fel Swyddog Cyllid. Cyn hynny bu’n gweithio yng Ngardd Fotaneg Genedlaethol Cymru am 5 mlynedd fel Swyddog Cyllid a Chyflogres. Mae ganddi dros 15 mlynedd o brofiad o weithio mewn swyddi gweinyddol a chyllid, yn y sector preifat, cyhoeddus ac elusennol. Ar hyn o bryd mae hi’n astudio ar gyfer cymhwyster ACCA. Pan nad yw hi’n brysur yn gweithio neu’n astudio, fe welwch hi yn yr ardd, allan yn rhedeg neu’n cerdded, neu’n teithio i lefydd newydd a diddorol.

Jen James

Swyddog Addysg

Mae Jen yn rheoli ein rhaglen addysg ac mae wedi datblygu rhaglen gyffrous ac arloesol gyda’n hysgolion Egni o’r enw ‘Rhyfelwyr Ynni ydyn Ni’. Mae Jen wedi gweithio ym myd addysg ers blynyddoedd lawer – yn gyntaf fel Llyfrgellydd ac yna fel athrawes Saesneg cyn setlo o’r diwedd mewn rolau yn y trydydd sector yn rheoli rhaglenni addysg. Mae hi’n angerddol am ddysgu pobl ifanc sut y gall byw bywyd cynaliadwy fod yn hwyl, ac annog chwilfrydedd, creadigrwydd a sgiliau meddwl yn annibynnol. A hithau’n hoff o’r awyr iach, mae’n edrych ymlaen at dreulio mwy o amser yn yr awyr agored a datblygu prosiectau addysg newydd cyffrous.

Mike Switzer

Cyfarwyddwr Datblygu Solar

Mike yw ein Cyfarwyddwr Datblygu ar gyfer Egni Co-op ac mae ganddo 10 mlynedd a mwy o brofiad mewn amrywiaeth o dechnolegau adnewyddadwy gan gynnwys Solar PV, Storio mewn Batris a phwyntiau gwefru Cerbydau Trydan mewn lleoliadau domestig a masnachol. Mae ganddo arbenigedd sylweddol mewn gweithredu a datrys problemau sy’n ymwneud â thechnolegau adnewyddadwy ac mae’n ymdrin â materion megis atgyweirio, amserlennu, gweithrediadau a chynnal a chadw gyda chreadigedd naturiol a chynllunio manwl. Mae ganddo ddiddordeb mawr mewn technolegau newydd, arloesi a gweithio tuag at yfory gwyrddach i bawb. Yn ei amser hamdden mae wrth ei fodd yn mynd â’i gi, Jensen, am dro ym mharc cenedlaethol hardd Sir Benfro.

Rosie Gillam

Swyddog Datblygu Egni a Chyfarwyddwr Egni

Mae Rosie wedi ymrwymo i fynd i’r afael â’r argyfwng hinsawdd a hyrwyddo ffyrdd cydweithredol o weithio, trwy gynyddu ynni cymunedol a chyflwyno addysg i ysgolion. Mae hi hefyd yn frwd dros ddatblygu arferion gwaith sy’n rhoi ystyriaeth i gyfraniad ynni adnewyddadwy at yr argyfwng ecolegol ac at anghyfiawnder cymdeithasol, a thros hybu ymwybyddiaeth o’r materion hyn. Ar ôl graddio yn 2015 gydag MEng mewn Ynni Adnewyddadwy mae hi wedi gweithio ar brosiectau solar cymunedol mawr a bach. Mae hi wedi gweithio i Awel Aman Tawe ar brosiectau Egni Co-op ers 2018 ac arweiniodd y gwaith o ehangu portffolio solar ar doeon Egni Co-op yn helaeth. Mae hi wedi creu cysylltiadau â phartneriaid ac wedi sefydlu systemau mewnol a fydd yn caniatáu i Egni Co-op ffynnu.

Ellie Critchley

Swyddog Datblygu Solar

Mae Elouise yn Swyddog Datblygu Solar i Egni Co-op. Mae ganddi BSc mewn Geoffiseg o Brifysgol Durham. Ar ôl graddio, dechreuodd weithio i Egni drwy gynllun Kickstart y llywodraeth a chyn pen dim, daeth yn aelod allweddol o dîm Egni. Mae hi wedi bod gyda ni ers 2021, yn gweithio i hyrwyddo datblygu mwy o osodiadau solar. Mae hi’n canolbwyntio’n bennaf ar asesiadau dichonoldeb a chwmpasu ar safleoedd newydd posibl.

Sachá Petrie

Swyddog Cludiant Cymunedol

Sachá Petrie was born and raised in North London. She’s a qualified Interior Designer having studied Architectural Interior Design at Nottingham Trent University. She ran her own business for many years in London and moved to Wales in 2017. She is leading Taith, our Community Transport Scheme.

Christine Burden

Swyddog Cludiant Cymunedol / Gyrrwr

Mae Christine yn Swyddog Trafnidiaeth/Gyrrwr ar gyfer Cydweithfa Taith AAT. Mae hi’n fam sengl hynod annibynnol i’w mab ifanc hyfryd a’i babi ffwr (Chihuahua). Yn ei hamser hamdden mae’n mwynhau pob math o grefftau o wau i wydr lliw a hyd yn oed ychydig o DIY – ond peidiwch â dwyn ei sgriwdreifer!

Louise Griffiths

Swyddog Ymgysylltu Cymunedol

Louise yw ein Swyddog Ymgysylltu Cymunedol ac mae wedi gweithio gydag Awel Aman Tawe ers 2022. Mae hi wedi bod yn brysur yn lledaenu’r newyddion am Hwb y Gors ac yn darganfod beth hoffai pobl ei weld yn digwydd yn y ganolfan. Mae hi’n dweud ‘Yn fy swydd i, dwi’n cael gwneud fy hoff beth a siarad â phobl!’ Ond yn fwy na hynny, mae hi wedi trefnu gweithdai, digwyddiadau a chyfleoedd gwirfoddoli i ennyn diddordeb cannoedd o bobl yn y gwaith o adnewyddu Hwb y Gors – tecstilau, gwydr lliw, garddio a cherameg.

Astudiodd yn Rhydychen, gan ennill BEd cyn treulio’r blynyddoedd nesaf ar y ffordd yn ymweld ag ysgolion ledled Cymru. Ar ôl i’w 2 fab gael eu geni, newidiodd i weithio gartref, gan redeg busnes cacennau creadigol. Bu’n aelod o Gymdeithas Rhieni ac Athrawon Ysgol Cwmgors cyn iddi gau ac mae wedi trosgwlwyddo’i chariad dwys at yr ysgol i Hwb y Gors gan sicrhau nad yw atgofion pawb a fu’n gweithio ac yn astudio yno yn mynd yn angof. Yn ei hamser hamdden mae hi wrth ei bodd yn cerdded a chwarae gemau bwrdd!

Ilona Shadrach

Swyddog Gweinyddol

Mae Ilona wedi bod yn gweithio gyda ni fel gweinyddwr ers 2019. Mae hi’n gweithio’n bennaf gyda’n haelodau Awel ac Egni Co-op. Mae ganddi BSc mewn Gwyddor Fiolegol ac ar hyn o bryd mae’n gweithio’n rhan amser tuag at Radd Meistr BioArloesedd Cymru gyda Phrifysgol Aberystwyth.

Bethan Edwards

Cadeirydd yr Ymddiriedolwyr

Mae Bethan Edwards yn Ddatblygwr Ynni Adnewyddadwy gydag RWE Renewables. Mae ganddi dros 17 flynedd o brofiad yn y rôl, gan ganolbwyntio’n bennaf ar brosiectau gwynt ar y tir yng Nghymru. Roedd hi’n reolwr prosiect ar gyfer Fferm Wynt Gorllewin Coedwig Brechfa sydd bellach yn weithredol, sef cynllun 28 tyrbin yn Sir Gaerfyrddin. Mae ei rôl hefyd yn cwmpasu sicrhau ansawdd, gweithdrefnau a rheoli risg, gyda chylch gwaith sy’n cwmpasu’r DU gyfan. Yn ddiweddar mae hi wedi cwblhau diploma ôl-raddedig mewn Cynllunio Addasiadau a Chynaliadwyedd yng Nghanolfan y Dechnoleg Amgen.

Alun Lloyd

Trysorydd yr Ymddiriedolwyr

Bu Alun yn gweithio yn GIG Cymru am 35 mlynedd cyn ymddeol yn 2019. Mae’n gyfrifydd cymwysedig a oedd, yn ystod ei yrfa, yn Gyfarwyddwr Cyllid mewn nifer o sefydliadau’r GIG yng Nghymru. Heblaw am gyfnod yn 2003/04 pan fu’n gweithio yn hen Fwrdd Iechyd Lleol Abertawe, mae Alun wedi dilyn ei yrfa yng Nghaerdydd a’r cyffiniau.

Yn Gymro Cymraeg o Landudno, astudiodd Alun ym Mhrifysgol Caerdydd, yna bu’n gweithio ac yn byw yng Nghaerdydd am nifer o flynyddoedd cyn symud i Ben-y-bont ar Ogwr 24 blynedd yn ôl.

O ran ei ddyletswyddau gwirfoddol, mae Alun yn gyfarwyddwr Tenovus Trading Limited, cangen fasnachu elusen Gofal Canser Tenovus.

Dr Catrin Maby OBE

Ymddiriedolwr

Mae gan Catrin radd gyntaf mewn Gwyddor Peirianneg a gradd Meistr mewn Rheoli Adnoddau Ynni, a dechreuodd ei bywyd gwaith mewn peirianneg rheweiddio, ond yna symudodd i effeithlonrwydd ynni mewn adeiladau oherwydd tlodi tanwydd. Sefydlodd Catrin wasanaeth cyngor ynni i denantiaid yn Llundain yn yr 1980au, gan ysgrifennu llawlyfrau ar gyngor gwresogi cartrefi, atal drafftiau ac ailgylchu. Aeth ymlaen i weithio gyda nifer o awdurdodau lleol i ddatblygu agweddau effeithlonrwydd ynni mewn rhaglenni adnewyddu tai, yn ogystal â strategaethau cynhesu fforddiadwy a lleihau allyriadau carbon. Rhwng 1999 a 2015, bu Catrin yn arwain sefydlu a thwf Asiantaeth Ynni Hafren Gwy, elusen gynaliadwyedd yn Swydd Gaerloyw, sydd ag amrywiaeth o brosiectau a phartneriaethau cyflenwi ymarferol a chyfnewid gwybodaeth yng Nghymru, De-orllewin Lloegr a’r UE. Ers 2015, mae Catrin wedi gweithio fel ymgynghorydd annibynnol ar ymchwil a pholisi yn y DU a’r UE, ac wedi cwblhau PhD yn canolbwyntio ar rôl y diwydiant adeiladu prif ffrwd mewn ôl-osod ynni cartref.

Mae Catrin yn aelod o Grŵp Gorchwyl Safonau Ôl-osod y BSI, a’r Sefydliad Ynni, yn gymrawd o’r RSA ac yn Gynghorydd Cysylltiol gyda’r Academi Ôl-osod a’r Cynllun Ardystio Microgynhyrchu. Derbyniodd Catrin OBE yn 2012 am wasanaethau i’r amgylchedd a thegwch cymdeithasol. Mae Catrin bellach yn byw ger Trefynwy.

Caroline McGurgan

Ymddiriedolwr

Astudiodd Caroline Beirianneg Fecanyddol ym Mhrifysgol Caerdydd ac mae’n ymgynghorydd ynni adnewyddadwy a rheoli prosiectau. Mae hi wedi gweithio yn y sector ynni adnewyddadwy ers 2006, fel Rheolwr Prosiect, Arweinydd PMO a Rheolwr Rheoleiddio a Chydymffurfio yn Eco2 Ltd, yn ymdrin ag amrywiaeth o dechnolegau adnewyddadwy. Roedd hefyd yn rhan o dîm datblygu fferm wynt Mynydd y Betws yn Sir Gaerfyrddin. Roedd ganddi brofiad o gylch bywyd llawn datblygu prosiectau – o asesu safleoedd hyd at reoli asedau.

Katie Powis

Ymddiriedolwr

Mae Katie yn Gyfarwyddwr cwmni cyfathrebu sy’n ymgysylltu â rhanddeiliaid a’r gymuned yn Alltwen. Mae ganddi dros 10 mlynedd o brofiad o weithio ar ennill caniatâd cynllunio ar gyfer prosiectau ynni adnewyddadwy, yn cynnwys storio mewn batris, llanw, gwynt a solar. Mae ganddi brofiad hefyd o ddarparu seilwaith rheilffyrdd a ffyrdd, cynlluniau datblygu lleol ac estyniadau trefol defnydd cymysg, ar raddfa fawr. Mae hi’n frwd dros wella llesiant cymdeithasol, economaidd, amgylcheddol a diwylliannol Cymru a’r DU.

Helen Roach

Ymddiriedolwr

Mae gan Helen dros 20 mlynedd o brofiad yn gweithio yn y sectorau gwirfoddol a chyhoeddus yng Nghymru, gyda hanner ohono wedi’i dreulio’n dylanwadu ar bolisi ac yn cyflawni prosiectau i fynd i’r afael â thlodi tanwydd yng Nghymru. Ar hyn o bryd mae’n gweithio i Gymorth Cristnogol, gan sicrhau bod cefnogwyr ymg Nghymru yn cael eu hysgogi a’u harfogi i gefnogi gwaith yr elusen yn mynd i’r afael â thlodi byd-eang ac effaith ddinistriol newid hinsawdd ar y cymunedau y mae Cymorth Cristnogol yn gweithio gyda nhw. Cyn hynny, bu’n Rheolwr Cysylltiadau Aelodau ar gyfer Tai Pawb, elusen sy’n canolbwyntio ar hyrwyddo cydraddoldeb ac amrywiaeth yn y sector tai yng Nghymru. Yn y rôl hon, bu’n helpu i ddatblygu a chyflwyno’r nod ansawdd QED arobryn. Mae Helen yn aelod cysylltiol o’r Sefydliad Arweinyddiaeth a Rheolaeth, mae wedi dysgu Cymraeg nes iddi fod bron yn rhugl ac yn aelod o dair menter gydweithredol ynni cymunedol, gan gynnwys Egni Co-op.

Brian Jones

Ymddiriedolwr

Symudodd Brian i Alltwen ym 1989 a bu’n dysgu mathemateg yng Ngholeg Castell-nedd Port Talbot nes iddo ymddeol ym mis Awst 2014. Cafodd ei fagu ym Mhen-y-bont ar Ogwr a dysgodd Gymraeg fel oedolyn. Aeth Brian i Brifysgol Caerfaddon i astudio Mathemateg, ac yn ystod y cyfnod hwn cafodd leoliad blwyddyn yn gweithio yn y Sefydliad Ymchwil Ynni Atomig yn Harwell. Yn sgil y profiad hwn, mae bellach yn gwrthwynebu ynni niwclear ac mae wedi bod yn weithredol yn CND Cymru ers blynyddoedd. Bu Brian yn Gynghorydd Cymuned am 8 mlynedd, ac yn llywodraethwr ysgol am 5 mlynedd.

Martin Jervis

Ymddiriedolwr

Peiriannydd sifil wedi ymddeol yw Martin a dreuliodd ei fywyd gwaith yn adrannau priffyrdd cynghorau lleol, yn gweithio’n bennaf ar ddylunio pontydd a strwythurau priffyrdd eraill. Datblygodd ddiddordeb mewn materion amgylcheddol fel pysgotwr yn ei arddegau. Wrth siarad â physgotwyr hŷn, daeth yn amlwg bod afonydd canolbarth Cymru wedi dirywio ers eu plentyndod. Sbardunodd hyn ei ddiddordeb mwy cyffredinol mewn materion amgylcheddol. ‘Mae’n braf gweld sut mae ‘breuddwyd gwrach’ wedi dod yn realiti ers hynny yn ystod fy oes. Roeddwn bob amser yn meddwl mai’r ateb i wrthwynebiadau i dyrbinau gwynt oedd dod â’r buddion yn fwy uniongyrchol i’r bobl a oedd yn byw’n agos at y tyrbinau ac felly, pan ymddeolais yn 2017, penderfynais roi fy arian ar fy ngair a buddsoddi swm cymedrol yn Awel Co-op.’

Chris Johnes

Ymddiriedolwr

Mae gan Chris brofiad helaeth yn y sector nid-er-elw, yng Nghymru, ar draws y DU ac yn ne Affrica, ac mae’n ymrwymedig i gyfiawnder cymdeithasol a hyrwyddo lleisiau cymunedol wrth wneud penderfyniadau. Mae Chris wedi bod yn Brif Swyddog Gweithredol yr Ymddiriedolaeth Adeiladu Cymunedau ers iddi gael ei sefydlu yn 2015 – mae’n darparu cymorth a chyllid i gymunedau ledled Cymru i wneud eu hardaloedd yn lleoedd gwell fyth i fyw ynddynt. Yn rhinwedd y swydd hon, mae’n cyd-gadeirio’r Bartneriaeth Dyfeisgarwch Cymunedol sy’n hyrwyddo dulliau cydgynhyrchiol o rymuso cymunedau rhwng y sector cyhoeddus a’r trydydd sector.

Cyn hynny, treuliodd 5 mlynedd yn gweithio i Oxfam yn rhedeg eu Rhaglen Tlodi’r DU a’u gweithrediadau yng Nghymru (gan gynnwys ymgyrchu dros newid hinsawdd).

Cyn hynny treuliodd 6 blynedd yn darparu cymorth i bartneriaethau Cymunedau yn Gyntaf gan redeg y Rhwydwaith Cefnogi Cymunedau yn Gyntaf, ac mae wedi gweithio i sefydliadau ieuenctid a dinesig yn ne Affrica. Ar hyn o bryd mae’n gadeirydd ymadawol Hub Cymru Affrica (swydd a gymerodd yn 2015) ac mae wedi dal rolau anweithredol blaenorol gyda Cadarn Housing a Phobl a Gwaith.

David Stonehouse

Ymddiriedolwr

Mae David yn wreiddiol o Frynaman, ond bellach mae’n byw yn Abertawe. Mae ei gefndir gwaith yn cynnwys bod yn Beiriannydd Electronig (Cyngor Sir Gorllewin Morgannwg), Peiriannydd Technegol (Cyngor Bwrdeistref Sirol Castell-nedd Port Talbot), Cymorth Electronig a TG (Dinas a Sir Abertawe). Mae gan David MSc mewn Technoleg. Mae’n siarad Cymraeg, Saesneg a Tsieinëeg Mandarin.